पुणे- कोरोनामुळे आणखी एक कुटुंब उद्ध्वस्त झालं आहे. हडपसर परिसरात राहणाऱ्या महापालिकेच्या कर्मचाऱ्यासह त्याच्या कुटुंबातील चार जणांचा मृत्यू झाला असून या घटनेमुळे हडपसर परिसरात शोककळा पसरली आहे. परंतु नागरिकांनी या घटनेची गंभीर दखल घेऊन कोरोनाविषयक नियमांचं काटेकोरपणे पालन करणं गरजेचं असतानाही विनाकारण बाहेर पडत नियमांचे उल्लंघन करत असल्याचे दिसून येत आहे.
                   मृत पावलेल्या श्याम कुचेकर यांना नोबेल हॉस्पिटलमध्ये त्यांच्या आईला जहांगीर हॉस्पिटलमध्ये, तर वडिलांना बाणेर येथील महापालिकेच्या कोविड सेंटरमध्ये आणि भाऊ विजय हे शिवाजीनगर इथल्या जम्बो कोविड सेंटर उपचारांसाठी दाखल झाले होते. कोरोनासोबत लढा देताना 9 एप्रिल रोजी लक्ष्मण कुचेकर यांनी प्राण सोडले. त्यानंतर आई सुमन यांचा 16 एप्रिल रोजी हॉस्पिटलमध्ये मृत्यू झाला. आई वडिलांच्या मृत्यूची माहिती श्याम यांना देण्यात आली नव्हती. मात्र श्याम यांची प्रकृती खालावली होती. सहा दिवस उलटून गेल्यानंतर गुरुवारी म्हणजेच 22 एप्रिल रोजी दुपारी श्याम यांचीही प्राणज्योत मालवली. त्यामुळे महापालिकेच्या कर्मचाऱ्यांमध्ये  शोककळा पसरली होती. श्याम कुचेकर यांचा अंत्यविधी हडपसर गाव इथल्या विद्युतदहिणीत करत असतानाच बाणेर येथे उपचार घेत असलेल्या त्यांचा भाऊ विजय यांचाही कोरोनामुळे मृत्यू झाला. अशाप्रकारे कोरोनाने एक अख्खं कुटुंबच हिरावलं आहे.

#solapurcitynews